ಬಜಾಲ್ ಪರಿಸರಕ್ಕೆ ರಾತ್ರಿ 8 ಗಂಟೆ ನಂತರ ಬಸ್ಸು ಓಡಿಸುವಂತೆ ಸಿಪಿಐಎಂಎಲ್ ಡೀಸಿಗೆ ಮನವಿ

ಮಂಗಳೂರು, ಜೂನ್ 09, 2026 (ಕರಾವಳಿ ಟೈಮ್ಸ್) : ಮಂಗಳೂರಿನಿಂದ ಬಜಾಲ್ ಪರಿಸರಕ್ಕೆ 23 ನಂಬರಿನ ಬಸ್ ಫೈಸಲ್ ನಗರ ಮತ್ತು 11 ಬಿ ನಂಬರಿನ ಬಸ್ ಜಲ್ಲಿಗುಡ್ಡೆ  ಮತ್ತು 9 ನಂಬರಿನ ಬಸ್ ಬಜಾಲ್ ಚರ್ಚ್‍ಗೆ ಹೋಗುವಂತಹ ಬಸ್ಸುಗಳಿಗೆ ಹಿಂದೆ ಆರ್.ಟಿ.ಎ. ಮೀಟಿಂಗ್‍ನಲ್ಲಿ ನಿಗದಿತ ಸಮಯವನ್ನು  ಕೊಟ್ಟಿರುತ್ತಾರೆ. ಆದರೆ ಇತ್ತೀಚೆಗೆ ಈ 3 ಕಡೆ ಹೋಗುವಂತಹ ಬಸ್ಸುಗಳು ಮಂಗಳೂರಿನಿಂದ ರಾತ್ರಿ 8 ಗಂಟೆಯ ನಂತರ ಬರುತ್ತಿಲ್ಲ. ಮಂಗಳೂರಿನಲ್ಲಿ ಕೆಲಸ ಮಾಡುವ ಕಾರ್ಮಿಕರು, ಕೂಲಿ ಕಾರ್ಮಿಕರು, ಬೀದಿ ಬದಿ ವ್ಯಾಪಾರಿಗಳು, ಬಟ್ಟೆ ವ್ಯಾಪಾರಿಗಳು ಹಾಗೂ ವಿವಿಧ ಕೆಲಸ ಮಾಡುವ ಕಾರ್ಮಿಕರಿಗೆ ತೊಂದರೆಯಾಗುತ್ತಿದೆ.

ಈ ಬಗ್ಗೆ ಬಸ್ಸು ಮಾಲಕರಲ್ಲಿ ಪ್ರಶ್ನಿಸಿದರೆ “ಕಲೆಕ್ಷನ್ ಬರುತ್ತಿಲ್ಲ” ಎಂಬ ಉತ್ತರ ಬರುತ್ತಿದೆ. ಆದರೆ ಇದು ಜನರ ಸೇವೆಗೆ ವಿರುದ್ದವಾಗಿದೆ. ಮಂಗಳೂರಿನಿಂದ ರಾತ್ರಿ 10.20ಕ್ಕೆ ಇದ್ದ ಬಸ್ಸುಗಳು ಈಗ ರಾತ್ರಿ 8 ಗಂಟೆಯ ನಂತರ ಇಲ್ಲ. ಮುಂಚೆ ಇದ್ದ ಸಮಯದಲ್ಲಿ ಅಥವಾ ಬೇರೆ ಸಮಯದಲ್ಲಿ ನಮ್ಮ ಊರಿಗೆ ಬಸ್ಸುಗಳು ರಾತ್ರಿ 8 ಗಂಟೆಯ ನಂತರ ಬರುವಂತೆ ಅಗತ್ಯ ಕ್ರಮ ಕೈಗೊಳ್ಳಬೇಕು. ಇಲ್ಲವಾದರೆ ಇಂತಹ ಬಸ್ಸುಗಳ ಮೇಲೆ ಕಾನೂನು ಕ್ರಮ ಕೈಗೊಳ್ಳಬೇಕು. ಅಥವಾ ಈ ಭಾಗಕ್ಕೆ  ಸರ್ಕಾರಿ ಬಸ್ಸನ್ನು ಕಾರ್ಯಾಚರಿಸಬೇಕು. ಬಜಾಲ್ ಪರಿಸರದ ಸಾರ್ವಜನಿಕರ ಬವಣೆಯನ್ನು ನೀಗಿಸಬೇಕೆಂದು ಒತ್ತಾಯಿಸಿ ಭಾರತ ಕಮ್ಯೂನಿಸ್ಟ್ ಪಕ್ಷ (ಮಾರ್ಕ್ ವಾದಿ, ಲೆನಿನ್ ವಾದಿ) ಲಿಬರೇಶನ್ ದ ಕ ಜಿಲ್ಲಾ  ಸಮಿತಿ ವತಿಯಿಂದ ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಲಾಯಿತು. 

ಸಿಪಿಐಎಂಎಲ್ ಜಿಲ್ಲಾ ಕಾರ್ಯದರ್ಶಿ ರಾಮಣ್ಣ ವಿಟ್ಲ, ರಾಜ್ಯ ಸಮಿತಿ ಸದಸ್ಯ ಮೋಹನ್ ಕೆ ಇ, ಜಿಲ್ಲಾ ಸಮಿತಿ ಸದಸ್ಯ ಅನ್ಸಾರ್ ಬಜಾಲ್, ಕಾರ್ಮಿಕ ಮುಖಂಡ ಮಹಮ್ಮದ್ ಮುಸ್ತಾಪಾ ಮನವಿ ಸಲ್ಲಿಸಿದ ನಿಯೋಗದಲ್ಲಿದ್ದರು.

Tuesday, June 09, 2026